告白第一爆

看了一會《告白》﹐很難不想起電視劇《人間失格》(1995)﹐很多細節﹐事實係一模一樣(殘虐小動物、護士針筒抽血、溺愛兒子的母親、集體欺凌的移情作用etc)。Nothing new under the sun﹐不論那個時代﹐心智殘障的廢青﹐時代空氣濃薄不一﹐道德觀念不同﹐但行為模式大同小異﹐開口閉口看了電影震驚心寒什麼的﹐假如不是太偽善﹐就是太善忘了﹐十來歲的人兒﹐禽獸一樣﹐至為兇殘﹐肉體發育初熟﹐力足強姦凌辱殺狗。在道德威權崩壞的大環境下﹐少年人有種殺無赦﹐成年人孭住層樓﹐行事比較陰毒和閃縮﹐殺人不見血﹐甚至以仁義道德包裝﹐分別不大﹐無須大驚小怪。

《人間失格》本來算低級趣味﹐但同《告白》相比﹐還是覺得有很多不落俗套之處。例如遇害少年是失足跌死﹐係冇兇手﹐而帶頭欺負少年的同窗﹐本來就係被欺負得最慘的弱者；到後來連老師都加入戰團﹐一齊狙擊少年﹐天地不仁﹐人性本來如此﹐而冷眼旁觀、愛莫能助的老師和同學﹐以至死者的父母﹐都要承擔一部分的責任。同松隆子一樣﹐兒子遇害後﹐爸爸赤井英和荒廢本業﹐當了復仇者﹐不眠不休搜集證據﹐不同的是﹐他是光明正大四圍搵人認罪﹐將罪不可恕的老師殺死﹐完事後自首﹐不失其光明磊落﹐最後坐牢﹐是他向兒子悔罪的救贖。

反觀《告白》﹐是二流推理小說格局﹐情理而言﹐可謂不堪一駁。例如松隆子同同學演講﹐將愛滋血放入兩個殺人學生的飲料喎﹐問題係﹐幾十個同學﹐佢地唔係共犯﹐冇罪責﹐就算冇用手機拍低upload youtube﹐只要其中一個﹐將事件向他人透露﹐寫blog寫twitter什麼的﹐警察同傳媒就會搵上門﹐愛滋血害人喎﹐松隆子點交待呢？ 點先唔穿橋呢？ 又例如松隆子假扮A同學母親網上留言喎﹐阿姐你當的後生白痴丫﹐A同學唔識查ip address既咩？

松隆子就好似o的南美屎波﹐左扭右扭﹐就係唔想入波﹐然後話好憎高Q大腳﹐搞呢搞路打飛機先係藝術。想報仇﹐廢柴差人幫唔到你﹐咪搵把刀斬死佢兩個羅。假如發生係特區﹐獨留4歲女兒泳池溺死﹐差人會第一時間用疏忽照顧兒童罪拘捕松隆子﹐搞咁多﹐就係一、唔想同自己的行為負責(愛滋老公、女兒溺死)；二、唔打算挑戰司法制度(對照周防正行《儘管如此我沒做過》)；三、冇興趣教好o的學生(精神虐待同學)。三點綜合而言﹐就係對家庭卸責﹐喜歡做順民安於現狀(接受官府控制而不尚改革)﹐以及唔想做好呢份工(I won't get the job done)。《人間失格》的匹夫之勇﹐手刃仇人﹐是過時的道德觀﹐也難怪走精面的《告白》﹐得到那麼多的共鳴。