20070730

老人的憤怒



呢套戲都可以羅《電影旬報》第1位﹐我只可以相信﹐是符合了不少日寇(可以選獎既評審﹐一般都係老人)埋藏著的憤怒﹐對《電車男》一路鳥人﹐以至《NaNA》一路鳥片﹐到了忍無可忍的髮指地步﹐所以一開場女主角畀老母鬧兩句﹐就要離家出走﹐絕不回頭﹐佢個種勇悍﹐於那些窩在房中吃喝、手淫、打機的宅男看來﹐又是何其匪夷所思呢。

依家會有的咁既人﹐以為抬頭望下個天﹐就會有本copybook跌落黎﹐一邊含住波板煻﹐一邊寫的人名寫上去﹐就可以「兵不血刃」﹐就能將仇人(包括老豆、女友等等)隊死;但呢班姐姐仔﹐唔睇電視﹐唔拖手仔(「壯男」都離鄉搵食去了)﹐爸媽在煤礦坑洞裡等死﹐佢地唔曉乜「經濟轉型」﹐只要為個人(個人就是個人﹐何需事無大小提昇到「女性」的程度呢)獨立打拚﹐套戲要設定在70年代﹐畫面荒茫﹐略帶褪色﹐即使松雪泰子set個七彩蝦條姐姐懷舊明星造型﹐卻不帶一點鶴立雞群的魅幻感覺﹐不遮掩伊面容蒼老﹐裡面自有其自圓其說的理性在。

淺人可能會譏刺﹐不過是Swing Girls一類老調﹐我會說本片實質是另一型的「陸上行舟」﹐要將不可能變為可能﹐不算現實﹐卻又不怎樣帶著夢幻感覺﹐與唸唸有詞「香港一定得」一類佛偈並不一樣。所以最後一個鏡頭蒼井優展開笑靨﹐導演給她來個freeze frame﹐現在看來我會形容是蝴蝶的標本﹐credit字幕說明以上全屬「真人真事」﹐更讓人清醒﹐也讓人覺得感傷﹐因為(凡)痛苦的港燦都知道﹐建華、唐唐和權權也已說得很清楚:經濟轉型為市民帶來的痛苦,難用一兩件事﹐也不是在一兩年內可以解決。阿門。