人肉八爪魚

荷蘭贏左
馬恩賜
http://hk.news.yahoo.com/article/100710/4/j3k5.html
(明報)2010年7月11日 星期日

馬恩賜係咪賭馬賭到矇左﹐定係畀港台炒魷﹐又冇人請佢講馬﹐過度壓抑﹐忍唔住向天怒吼：「我好有眼光丫」﹐「我講的野好準丫」。左一句：「我敢說典樣典樣」﹐右一句：「我夠膽預測如何如何」﹐睇完成篇野﹐重點唔係講波﹐作者其實想講：「在南非世界盃舉行之前，我作了幾個預測，不幸，這些預測都準確了。」 問題係﹐我想睇分析者﹐好似沈旭龜咁﹐講下地緣政治﹐好似曹捷咁﹐講下烏拉圭好風光都冇壞丫﹐阿叔你係老幾者﹐你好有眼光﹐關人隱事咩。

我夠膽預測特區永遠唔會有真普選

馬恩賜不幸言中的所謂世界杯預測﹐例如：「世界杯的足球水準不及球會」，例如：「我夠膽預測﹕亞、非球隊可以進步，但永遠不會進步到能跟足球強國平起平坐，永遠都不可能贏到世界盃」﹐同麥玲玲差唔多﹐大部份係阿媽係女人﹐同「我夠膽預測：特區永遠唔會有真普選﹐五年後民主黨會吞併民建聯﹐余若薇永遠做唔到特首﹐社民連一定會同民主黨配票選舉」一樣﹐阿毛都識講。

逐一反駁佢﹐係多餘既﹐例如佢話：「國家隊只能用在外國搵食的球員，他們恍如僱傭兵，相聚幾星期便上陣，哪能打出優秀的整體戰術？」﹐但由86年世界杯開始﹐巴西、阿根廷的主力都係歐洲踢波bor﹐成隊都係「僱傭兵」bor﹐典解當時又冇人話佢地打唔到「優秀的整體戰術」呢？ 「巴西為什麼打不出森巴足球？因為好的巴西球員都在歐洲踢球，球會哪會容許他們打森巴足球？」咁朗拿典奴係巴塞都踢得好森巴bor﹐美斯係巴塞都踢得好探戈bor﹐佢地又典做到呢？

小弟冇睇季軍戰﹐睇左其餘三場﹐唔敢講經典﹐但體能超級勁﹐球技戰術都不錯(至少好過睇曼聯鬥拜仁什麼的)﹐最精彩﹐應是西德對西班牙﹐西班牙高章是意料中事﹐西德球技一般﹐但戰術性針對﹐亦難度很高﹐唔容易做到。馬恩賜話：「欠缺強大進攻力量的球隊，怎會產生令人難忘的球賽？」﹐不外淺人之見。西班牙唔算擁有「強大進攻力量」吧 (假如入波多就等於有「攻力」﹐入波少就等於沒「攻力」的話)﹐但佢地的小組踢法texture細密﹐超乎尋常﹐空間運用超凡﹐佢地用四五一陣式 (還是四二三一？有分別嗎？)﹐巧奪天功﹐絕不屈機。

冥頑不靈老屎忽

老屎忽的可恨與冥頑不靈﹐呢段表露無遺了：「今屆世界盃的最大贏家，一定是荷蘭。1974及1978年的荷蘭隊，好波，但贏不到冠軍。他們贏了今晚的決賽，足以彰顯Justice has been done。縱使西班牙勝出，也是荷蘭的Total Football贏了！......西班牙勝出，等於「全面足球」勝出。你說，是不是無論哪一隊贏，都是荷蘭的勝利？」

74及78年荷蘭屈居亞軍﹐距今超過30年﹐告魯夫、尼斯堅斯等名將﹐做得洛賓阿爺﹐今屆荷蘭都唔敢認踢Total Football﹐除非落場踢既係告魯夫佢地班阿伯啦﹐否則兩者根本關係不大﹐即使捧杯﹐又點能是Justice has been done呢？ 同理﹐巴西隊82及86 兩屆踢好波被淘汱﹐94年世界杯踢垃圾波得冠軍 (決賽0比0互射12碼勝意大利)﹐你好意思說這是Justice has been done嗎？幸好荷蘭沒贏﹐否則會是現代足球的國殤﹐是Total Football的恥辱。

「西班牙勝出，也是荷蘭的Total Football贏了！」﹐一來西班牙踢的唔係Total Football； 我當你係﹐都係荷蘭領隊Rinus Michels的Total Football初級理論贏了 (同理﹐中國共產黨超英趕美大把水﹐你能說是馬克思的勝利嗎？ 是毛澤東的勝利嗎？)﹐亦唔等於係「荷蘭的勝利」。打從第一場踢垃圾波起﹐到決賽用穿心腿踢人終﹐荷蘭已徹頭徹尾輸左了。

今人論世界杯﹐「賭波學」、「假波學」等才是王道﹐刻意漠視﹐東拉西扯又有個屁用？ 不過鴕鳥心態﹐係搔不著癢處的。主耶穌生於馬糟﹐馬恩賜則生於馬場草地﹐被養育於單Q投注站﹐長大成人於沙圈直播室﹐卻連這點都未看通﹐真係枉稱沙場老馬了。