20100708

唔駛問阿Paul

四年冇睇波﹐隨喜看了兩場﹐烏拉圭對荷蘭好悶﹐亂鬥亂水鬥水﹐很像「真波」﹐反而冇睇頭﹐看了半場睡了;西德對西班牙﹐小組踢法有意思至少能看完﹐但不出所料﹐又是一次可恥的「假波」﹐真是神人共憤。

一、典解特區富豪第二代連斗零都要榨乾你?

西班牙下半場好辛苦先頂入一球﹐之後畀西德狂攻﹐卻離奇地換出前鋒David Villa﹐換入廢托﹐等於自插一刀﹐露骨馬腳﹐講明這是假波了。臨場形勢﹐勝敗只差一球﹐重有一個骨先完場﹐西班牙一直攻極唔入﹐有乜咁把炮呢? 典解咁睇唔起對手呢? Villa係大賽球員﹐今場表現一般﹐至少羅波冇甩拖﹐好笑的是﹐廢托入替只能以龜速行走﹐簡直衰多兩錢重﹐等於打少個。

典解會咁﹐小弟只能提供一個解釋:兩隊都想維持一比零的賽果﹐西德高路斯也無作為﹐所以能老神在在;而Villa好想入波﹐唔肯做戲﹐勒唔住佢﹐唯有落柯打換佢出場。淨係控制賽果﹐佢地都唔滿足﹐重要人手襟低Villa 神射手盤口﹐就好似特區富豪第二代﹐壟斷市場都唔夠﹐斗零都要榨乾你。

Villa離場不久﹐西班牙立刻有次2打1﹐翼鋒Pedro做細既﹐竟然唔畀波大佬廢托﹐唔畀佢入單刀波﹐假如唔係幕後有人指示﹐Pedro邊會咁夠薑呢? 同樣道理﹐西德唔想入波﹐西班牙亦唔想入波﹐更加唔想廢托入波﹐佢地只想廢托狀態繼續「低迷」﹐然後買佢決賽首名入球﹐等佢決賽做隻睡醒的獅子﹐再賣個好價錢轉會吧。

二、典解曾智華要駕車去又一城睇老人半價早場?

閱讀「假波」,只要看最終結果,就夠了。這不是淫照風暴﹐也不是Watergate﹐唔駛上庭﹐不需「證據」﹐需要的話﹐人們不妨捏造「證據」﹐切勿理會思考過程是否合乎「理性」,甚至局中人有無「犯罪」意圖﹐也不必理會。所以「細哨咁多女﹐咁多水﹐點解要踢假波」之類﹐不過是很天真又傻的問題﹐等於梁錦松咁多水﹐點會偷步買車貪雞碎咁多呢? 曾智華咁多退休金﹐點解睇戲唔睇正場﹐要睇老人半價早場呢? 港台中人高薪厚祿﹐點解重要搞咁多貪贓枉法的醜事呢?

現實就是﹐英國和巴西隊這些名牌﹐以至中國隊和新西蘭隊這些垃圾﹐場場造假﹐而你奈佢地唔何。這是時代的墮落﹐這是足球的幻滅﹐是睇波的人﹐賭波的人﹐踢波的人﹐講波的人﹐播波的人﹐以至根本唔睇波的人﹐所有人的「共業」,萬般帶不走﹐唯有業隨身﹐有線付四億港幣買世界杯轉播權﹐錢從那裡來?錢往哪裡去?人世種種﹐因緣聚合,相激相盪,形成的必然的無可扭轉的假波旋渦。

三、典解何俊仁要交代同共匪有冇檯底交易?

一切迷霧都撥開了﹐今屆決賽的看點﹐不是誰勝誰敗 --- 四年前施丹頭槌爆馬達拉斯時﹐包廂裡的大佬們已內定了 ---﹐而是神射手誰屬這個令人頭痕的大問題。4隊波﹐Villa (5球)、高路斯 (4)、科蘭 (4)、史尼達 (5)都有機會﹐微妙的平衡﹐是如何達致? 一如前述﹐不要再追問誰是Deep Throat﹐誰是「幕後黑手」(根本沒有「黑手」﹗)﹐就正如你不要問何俊仁﹐民主黨和共匪有無「檯底交易」吧﹐有又如何?冇又如何?一切都只會依「議程」進行﹐你要反對﹐爆粗擲蕉打飛機皆無用﹐建議你不妨潛入民主黨總部﹐竊聽何俊仁律師事務所電話﹐再問問海牙國際法庭會否受理﹐還是你能力排眾議﹐提供另一種祖宗十八代接受的「選舉辦法」?

絕妙之處是﹐季軍爭奪戰早一天舉行﹐可以睇定來食。宇宙的奧妙﹐在於萬事萬物﹐無人驅策﹐自能互惠互利﹐建構微妙的平衡。西德和烏拉圭兩頭敗犬﹐將各有所得:西德的高路斯可以「圓夢」﹐入兩球歷屆總入十六球﹐超越巴西大哨名入史冊﹐作為「交換」條件﹐第三名的獎牌則會讓路烏拉圭。淺人看來﹐西德屈居第四﹐恐怕又算「爆冷」﹐又是「莊家」通殺了。

既然高路斯入六球﹐Villa要得神射手的安慰獎﹐決賽會入兩球﹐總入七球﹐加上廢托的首名入球﹐則西班牙決賽上半場會攻入荷蘭三球。下半場會否上演球迷奇遇記﹐讓荷蘭發揮全能足球的「霸氣」﹐「摧枯拉朽」入四球奪標﹐比西德狂數英國和阿根廷更離奇? 依後果看前因,絕非馬後炮﹐一切都自有因緣﹐非常合理﹐動輒批人爆冷和造假﹐不過源於天真與無知。

No comments: