毒男自毀學

看了鬼眼導演的After Earth﹐一點也不行(行貨那個行)﹐還有有點high。片子混合了科幻片、家庭片﹐愛情片、cadet片(新紥師兄)、兒童片、災難片、驚慄片、動物片、武俠片﹐共冶一爐。

劇透
冇所謂啦﹐你都唔會睇架啦(套戲同呢篇野)

成套睇完﹐小弟先明﹐After Earth裡的外星怪物﹐其實是「女人」的隱喻﹐怪物造型來自《異型》(少年主角下面望上去﹐佢係度流口水)﹐《午夜凶靈》(女鬼井底爬出來)之類﹐咁就覺得妙不可言。 而Will Smith從來唔教少年主角﹐當你遇到怪物(女人)時﹐個心撲撲咁跳時﹐費洛蒙狂飇時﹐你應該典做 ------- 少年人﹐你只有一件事可以做﹐跑呀。

片子同鬼眼導演作品一脈相承﹐與人間格格不入的奇人﹐接受救世天命。Will　Smith的對白：「danger (武按：女人的威脅)是真的﹐但fear(武按：心跳﹐即愛情的隱喻)是假的」(大意)。

「躍起之後. 勢須下落. 而今問題在. 你如何去平伏那心跳？」李李李天天天天命

After Earth的少年﹐要像爸爸Will Smith咁接受天命﹐就要抑制自己的心跳 ------ 怪物撲到面前﹐依然像陳志雲﹐唔好驚，唔好亂，唔好放棄﹐怪物聽唔到我的心跳。心跳可以用科技量度﹐但除非你有天耳通﹐否則乜柒都聽唔見。就算我心跳到死﹐都唔要畀的女聽見。

http://www.youtube.com/watch?v=U0opc9jUkIY
東京事変
Love is an Illusion (Get it Up For Love) slightly remixed

After Earth裡「不會心跳的人」﹐爬上華山之巔﹐才是強中之強；就像野島伸司日劇﹐「不會流淚的人」﹐不像溫爺爺假哭﹐唔用眼藥水﹐就只能等待淚腺崩潰的那一天﹐個心滿溢了溫情、悔罪、我供左層樓畀妳啦﹐咁班女就開心啦。

用愛情隱喻觀之﹐After Earth重可以接通古谷實的漫畫：女人是引領男人走進地獄﹐與社會融合的惡鬼﹐廢柴(古谷實作品)和救世豪傑(鬼眼導演作品)﹐都不是正常人﹐在殺人與自殺之間徘徊。而回到女人的懷抱(重建家庭)﹐則是佢地重回正途﹐變返個正常人的路徑(咁你話幾咁無聊呢)。

《庸才》：厲鬼來襲

當男人對女人的靈魂和肉體都再冇興趣時﹐依據After Earth的說法﹐女人的對策有二：

一、死畀你睇﹐你欠左我架；

二、你晚晚唔返黎﹐我冇所謂呀﹐我晚晚出去溝仔﹐但你典對得住屋企個仔仔呢﹐佢係度等緊你架嘛。

末了Will Smith夫子﹐一家三口重建家庭﹐鬼眼導演從Unbreakable裡Bruce Willis等悲傷英雄﹐Lady in the water裡的精神病看更阿叔﹐兜兜轉轉了幾十個圈﹐回到闔府統請的大團圓結局﹐人各有志﹐大家開心﹐咁都冇咩唔好呀。你仍然有一個option﹐一念之間﹐可以做番個正常人﹐這毋寧是幸福的。

《沒有玫瑰的花店》：你要流淚﹐我是winner

After Earth最離奇﹐是下半部玩到變了《神鵰俠侶》﹐有隻鵰兄﹐一次又一次救了少年主角一命。恐怕唯有香港觀眾﹐先會由此想起劉德華和陳玉蓮：十六年後﹐過兒不再做神鵰俠﹐與小龍女退隱江湖﹐跟木村拓哉及松隆子不一樣﹐小弟不相信﹐會是幸福的結局。

http://www.youtube.com/watch?v=0HxP0QWF9qI
幸せな結末

以上﹐新類型意識很流﹐混雜mv、電話圖像、劣詩、罵街﹐爛歌、浮想影評﹐是我的另創新楢﹐願你以另眼相看。

嘩﹐你睇到呢鼠﹐重睇埋呢句﹐你好野呀﹐我愛你/妳呀。

封塵筆記本#1

看完《戀戀封塵》修復DVD﹐又有很多新發現。

《戀戀封塵》結局
盜拍：阿武
http://www.youtube.com/watch?v=pIeOVq6EzwA&feature=youtu.be

阿遠服完兵役回家﹐成間屋都冇人﹐見到阿媽訓晏覺。

鏡頭hold完唔郁十秒(00:25-00:38)﹐茂利會話﹐一個師奶訓覺者﹐做咩hold咁耐呀﹐有咩咁巴閉呀﹐大師呀﹐係咪故弄玄虛呀。

我就會話﹐就係要hold咁耐﹐先進入到個男仔的心理層次。一路睇﹐唔明﹐經過十年﹐再睇﹐觀眾先會醒覺﹐原來呢個鏡頭﹐講阿爸阿媽老了﹐然後﹐我也老了。

當你阿爸阿媽六七十歲以上﹐大熱天時你下晝返到屋企﹐你會開冷氣﹐但佢地唔會開﹐有時佢地會鋪張蓆﹐係地下訓覺﹐慳電。

另一種情況﹐更常見﹐則係部電視一路開住﹐而佢地痴痴呆呆﹐坐o係張梳化度訓覺。

見到咁既時候﹐有時會覺得煩﹐有時覺得傷心﹐冬天時﹐你可能會羅張被放係佢地身上﹐咁佢地就會責醒。

《戀戀風塵》阿遠個主觀鏡望住阿媽訓覺咁耐﹐未必係真﹐但呢個映像﹐將會長埋我的心底﹐不止十秒。

後來男主角去蕃薯田﹐搵阿公李天祿﹐阿公暗暗尋尋﹐唔知o翕咩﹐「幹伊三妹﹐照顧這些蕃薯心照顧高麗參還累」﹐講完又講。

很多很年後(即尋日2013年6月17日)﹐我先明白﹐阿爸阿媽老左之後後﹐佢地講野﹐就會不停重複﹐講完又講﹐可能因為佢地冇野好講﹐佢地連自己講過咩﹐都已經唔記得左了。

導演唔會畀個阿遠的反應shot (如果導演咁做﹐可能我會睇到喊﹐而不是清醒的感動)﹐佢咩都唔搞﹐只會令我想起﹐好很多年前﹐個女仔第一次去台北﹐就係帶住阿公種的一袋蕃薯﹐羅去畀個男主角﹐而都係徒勞﹐發晒芽都冇人食。

最後空鏡﹐山雨欲來﹐烏雲壓頂(03:40)﹐小弟想起三種境界：

第一境：個老野o翕咩春﹐鏡頭又唔郁﹐唔知佢做乜﹐訓醒完場。

第二境：回到中國詩詞抒情傳統﹐附與左個空鏡一個意義wor﹐歲月悠悠﹐天地不仁﹐不以物喜﹐不以物悲﹐影評人咁講﹐我咪咁覺得羅。

第三境：結合了我的生命經驗﹐老野暗暗尋尋﹐我唔會追尋佢講野係咪意思﹐痴痴呆呆﹐無所謂﹐我唔會流淚﹐但我開始明白﹐重有點傷心。

楊德昌《一一》﹐結局無啦啦有個小學生作文﹐寫乜春「我也老了」﹐compare with《戀戀封塵》﹐個作者咪就係死蠢羅﹐咪係墮落羅。

你咁老屈個細路﹐先唔好講係咪make sense先啦﹐我當你make sense﹐你個電影主題﹐唔係直畢甩叫個角色講出來架嘛﹐咁咪好平羅﹐你咪又係當的觀眾係傻架羅。

套戲重會人人讚好﹐咪蠢到爆﹐蠢到死羅﹐呢的咪藝術高下羅﹐阿哥。