寶石影印飛

這張人手劃飛﹐有點特別。首先是顏色﹐很少見白色。其次左邊撕飛部份﹐沒有一行細孔。摸摸紙質﹐原來是A4影印。

接過這張飛﹐見不到一行撕飛小孔﹐小弟誠惶誠恐﹐入場時典辦呢？難道free到唔駛搣飛？ 還將戲票左側四分一對折﹐方便入場搣飛姐姐。誰料她很熟練﹐一野就將飛撕成兩邊了。從驚怖中清醒過來﹐順勢入場。

與人為善﹐我只好相信﹐是前一輪《我愛HK2013》﹐反應太好﹐戲飛用晒﹐只好影印頂住。另一個前衛的理由﹐可能是一場「行為藝術」： 冇feel就是冇feel﹐戲飛可以「影印」﹐對電影的愛情則不可。

寶石很乾淨 (對照條街陣陣熟食惡臭)﹐也很空虛﹐一室皆寂﹐有點禪意﹐大堂有一台舊式放映機展覽﹐比家徒四壁好一點。職員疑似四個﹐一個賣飛青年﹐一個少女房內寫野﹐一個阿嬸搣飛(想必兼任清潔)﹐還有一個放映員﹐成日會撻撻聲o係個放映間行出行入(類似以前影藝有個著拖鞋的人)。

廁所舒適﹐唔駛行幾層樓﹐清潔液明顯溝水。與同類型戲院比(如塘尾道戲院﹐如猝死新京都﹐甚至如影藝)﹐放映設備簡直超級﹐放映間大﹐熒幕座椅均甚好﹐那些千年飛機陳漬﹐都早付之一炬﹐OL港女們﹐毋須有衣沾不足惜的鬥志﹐可以放心入場。

看《林肯》﹐來回睡了幾次﹐都能靜靜入定﹐沒人打擾。苦了清潔阿姐﹐要抺那一地口水。

寶石遺世獨立﹐上yahoo電影﹐全港戲院一覽﹐是找不到的。

放映間只有一間﹐則是死症﹐放另類片﹐冇人睇﹐放大路戲﹐做乜要來睇你？ 除了戲飛平﹐放港產片﹐更是死路一條。

所謂香港電影節﹐諗都冇諗過租寶石來搞野﹐《低俗喜劇》又唔來重映﹐要做落去﹐困難重重﹐要更努力。

注：題目「影印飛」﹐源自90年代中﹐王菲曾被小眾攻擊為「影印菲」。