20140825

沒有誰比誰更高尚。 ------ 談《失戀急讓》

《失戀急讓》跟黃真真的《閨蜜》﹐有些共通之處﹐
除了導演是女人﹐劇情都不外乎男女性愛、家庭關係、親情愛情、女人好鍾意錢之類。

有趣的是﹐《閨密》明明手法高明、演技可喜、以政治隱喻言﹐不少弦外之音﹐但惡評如潮。
《失戀急讓》則演員無火花﹐導技笨拙(請看Angelababy援助交際那兩場戲)﹐劇本惡劣(即所謂對白唔係人講o既)﹐價值觀扭曲﹐但頗多褒揚。

何解呢?
很簡單﹐《閨密》貌似諂媚﹐實際挑戰主流價值(即男權﹐及迎合男權的女權)﹐令主流觀眾不安﹐於是粗口橫飛﹐亂飛帽子。
而《失戀急讓》則不一樣﹐表面看在挑機(買樓唔重要)﹐其實迂迴曲折﹐逢迎主流價值﹐像替不用腦的觀眾做腳底按摩﹐暗暗叫好。

不舉啦﹐你班賤人

試看《閨密》結局﹐三條女向噴水池許願: 薛凱琪要晚晚同靚仔上床﹐但唔會染性病;楊子珊要做成功導演﹐重要搵好多錢;陳意涵要愛情美滿﹐條仔不多不少每次做半小時﹐對其他女人則不舉。

女人要事業﹐要搵錢﹐要男人專一﹐即是動搖了男人權力(不舉啦你班賤人)。

女人可以專一﹐也可以要性解放﹐嘗百草(而唔會染性病)﹐冇興趣結婚生仔﹐而三條女要永遠在一起(所以有不吃人間煙火﹐唔駛做﹐同住豪宅的夢幻)﹐扭轉女人冇真正朋友的myth﹐但又唔係搞同性戀。三人行﹐並行不悖﹐於是不知不覺﹐三條女的A.T. Field內﹐就將傳統家庭、所謂「愛情」﹐以至以男權為中心建築的理想國﹐摧枯拉朽地毀滅。

《閨密》講女人向男人奪權﹐但離中有合﹐權力重新分配﹐建立烏托邦(咁你話班女打飛機亦得)。

《失戀急讓》則講兩個家庭解體﹐夫婦子女離散﹐而後通過炒樓﹐也即是用大量的錢﹐來重建家庭。回歸道統後﹐旁觀他人之痛苦(山頂俯視維港兩傍眾生﹐只是地產商的八百萬奴隸)﹐有情人攬埋﹐偽裝什麼都沒有發生。

假如電影真係講買樓唔重要﹐人情、親情先最重要﹐亦不過是另一齣「最緊要一家人齊齊整整」的低智劇集。編導的計算﹐是用親情、愛情﹐來合理化「炒樓」。戲中人用「炒樓」﹐搵到好多好多錢﹐於是才有「自由」(結局Angelababy同個中國二世祖去非洲流浪;張家輝、鄭秀文買晒樓﹐然後去郊野露營)。於是講出電影的主題: The Next Best Thing is to be Free。

邊得你咁賤丫﹐仆街

談到「自由」﹐根據匈牙利詩人菲多非﹐「不自由﹐毋寧死」﹐寧為玉碎不作瓦存﹐是西人推崇的價值觀。香港人則不打算為自由付出什麼(遑論去死)﹐至多是付錢﹐像《國產007》的刑場﹐暴政鎗前﹐付鈔免死。於是要「炒樓」搵好多好多錢﹐然後用自己默默耕耘的成功故事﹐教訓班後生﹐沒有免費午餐﹐Freedom is not for free(免費)。中國殖民大軍壓境﹐明年今日﹐公屋都冇得你輪架啦﹐細路。

面對暴政﹐唔會諗典反抗﹐只會走精面﹐扮犠牲﹐再從中取利(即係要錢)﹐呢個先係香港精神。
天天被羞辱﹐一點都不覺可恥﹐繼續同流﹐重會不斷搶奪道德高地﹐為家庭﹐為愛情﹐為守護下一代﹐我幾辛苦﹐幾委屈﹐都係值得o既。

像一般偽善的港產片﹐《失戀急讓》會製造幾個虛幻的、不道德的敵人: 港女胡杏兒、藝術家黃子華、來自中國的暴發戶等等。他們都好勢利、好多錢﹐冇愛情﹐於是我地(張家輝、鄭秀文等等)就同佢地有區別: 我地係窮人﹐但有愛﹐炒樓都係無可奈何﹐過水濕腳﹐都係搵啖飯食o者﹐邊得你咁賤丫﹐仆街。

片末張家輝、鄭秀文豪宅被強收﹐最危急關頭﹐獲胡杏兒之助﹐走出鬼門關。與其說港女良心發現﹐倒不如說也不過是一丘之貉: 物傷其類﹐他們都不過用追求愛情、生仔、重建家庭﹐來包裝自己﹐其實不過貪慕虛榮﹐縱情享樂﹐只想要錢而已。

於焉﹐銀幕下的觀眾得到釋放:

人同此心﹐心同此理﹐和平理性﹐互相包容﹐沒有誰比誰更高尚。
繼續噤聲﹐繼續沉淪﹐舊organ巴洛克風中﹐抹去a whiter shade of pale﹐粉嶺港鐵車站隻唐狗其實係抵死o既﹐你話係咪?

A Whiter Shade Of Pale - Procol Harum
https://www.youtube.com/watch?v=Mb3iPP-tHdA

2 comments:

Anonymous said...

thank you ....400

阿武 said...

多謝支持~