眼光光之島

笑談《寵愛情人夢》

呢套戲好有驚喜﹐頭個半鐘睡了幾次﹐但最後半個鐘﹐扭屎忽花又幾好﹐咪以為淨係靚妹或師奶鍾意﹐鐵漢如我﹐竟然有o的眼濕濕﹐流下狗熊哭......

呢套都可謂係幼齒版的《巴黎戀愛寫真》﹐夕陽無限好﹐只是近黃昏﹐一刻的快感﹐剎那親近﹐風花雪月不等人﹐一如香港的命運......

無所謂劇透﹐你睇個香港中文譯名﹐都估到九成﹐故仔似舊式日本漫畫﹐即手塚那隻﹐但竟然玩出新意思......

最絕的是﹐編導竟然玩Beach boys的音樂。樂迷當然知道﹐夢幻背後﹐充滿黑暗和殘酷(Beach boys成員與文遜家族的故事)......

末了上野樹里和男主角講了個黑色笑話﹐跟金魚和Beachboys有關﹐真係近年睇過﹐最高境界的殘酷.....

犀利在﹐編導竟然係銀幕玩卡拉OK﹐一路播Beachboys的歌﹐一路配英文歌詞﹐於是呢套「卡通電影」﹐即刻昇級﹐變了愛情的寓言。野島伸司都唔玩西洋舊歌﹐佢竟然夠膽繼續玩......

最鐘意男主角知悉真相後﹐即刻想閃﹐好真實﹐可惜冇拍落去.....條女知道條仔驚﹐玩我走先﹐更絕﹐這是(女人幻想中的 )女人的命運......

條女救左街坊性命﹐冇人多謝佢。一如幾十年來﹐香港人幫共匪咁多﹐共匪都唔會講多謝﹐老馮之餘﹐重唔隊死你﹐先吸乾你的血﹐然後好似Alien咁﹐將你禁室培慾﹐產卵﹐禍延世界......(扯得太遠了......T-T)

重有對電影個form的探討﹐成套睇完﹐感覺到編導對成個岩井俊二以降﹐日本青春影象風格的irony: 成套戲都係好浪漫的黃昏日光﹐逆光影住條女的身影﹐好夢幻﹐好假﹐但睇到最後﹐又由假入真......

扮識日文的茂利如我﹐附會講句﹐「江之島」（ えのしま）﹐懶音勁如上野樹里﹐也可讀「光之島」（こうのしま）.....

「電影﹐不是構圖﹐不是節奏﹐光是電影的全部」
------- 杜可風

光﹐總有熄滅的一刻......也如岩井的電影﹐也總有被人遺棄的時候......

導演之前好似拍過吉高由里子套戲﹐即刻要download來睇.....希望唔好訓著......

ＰＳ 結局隻貓眼神超型。

PPS 勿忘松本潤與小雪主演﹐大森美香日劇《きみはペット》。