看了《追凶》﹐劉青雲演賤人﹐反而覺得好。以他的功力﹐相信不難﹐但準繩如何拿捏﹐也有一番功夫。除了好人、壞人、廢人﹐還有賤人﹐香城無大事﹐小人特別多﹐也是不爭的事實。例如政治界的曾蔭權﹐專欄界的陶傑﹐電影界的彭浩翔﹐都是特別特出的俊彥。什麼叫賤？例如《春嬌與志明》﹐賤人想非禮空姐又唔敢﹐然後賤人有好報﹐空姐自動獻身﹐背後淫笑的編導和觀眾﹐就是賤。這些賤人、縮骨精、犬儒主義者、飛機王﹐他們的優勢﹐是你根本不屑去打罵﹐又非大奸大惡﹐鬧佢都o徒gas。
《追凶》的劉青雲是曾偉雄旗下鷹犬﹐心境陰暗﹐時時遇上黑影。為了見board昇職﹐佢往往順水推舟﹐在職場﹐在家庭﹐搞各種陰謀詭計。他的聰明﹐係陰o的陰o的﹐背後說人短長﹐唔會大鑼大鼓﹐畀佢踩住上都沒有知覺。有場戲幾好既﹐劉青雲個仔係白痴﹐佢好憎自己個仔﹐突然對佢好親切﹐原來只係為了叫個白痴仔幫手查案。片子對劉青雲的道德譴責﹐係不著痕跡的：劉青雲用來呃個白痴仔的道具﹐是一罐可樂﹐刻薄之處是﹐片初佢在差館﹐同樣用一罐可樂來利誘白痴犯人﹗ 一直在旁邊望住﹐佢老婆萬綺雯﹐睇住青雲典對個仔﹐百感交集﹐佢就係咁賤﹐你又能奈佢咩何？真是萬語千言﹐盡在其中矣。
在我來說﹐《追凶》的劇本值得注意﹐編劇是司徒錦源﹐小弟懷疑與《阿嫂》有關。觀眾拗情理不通﹐好多bug什麼的﹐只是淺見﹐佢個主題出得靚丫嘛﹐吹咩。靚的基礎﹐係劉青雲個角色寫得好丫嘛﹐結尾twist番埋去佢身上﹐簡簡單單﹐重幾感人添﹐當你個角色立體﹐講道德都唔覺陳腐。
小弟也想起鬼眼阿星導演的Lady in the Water﹐不過阿星玩奇幻mode﹐《追凶》玩鬼片驚慄格局﹐同樣有本童話書﹐阿星放在片頭﹐《追凶》放在片末﹐這不是關乎宿命﹐是關乎選擇﹐道德的抉擇﹐比少女的祈禱、母親的抉擇重要。阿星格局大(當然你有權話佢大而無當)﹐往往講o的卡大卡大的主題﹐天命救世heal the world什麼的﹐《追凶》貼近特區人小眉小眼﹐目光不離自己肚臍的淺人視野。在特區這令人無法不氣餒的環境﹐像李子誦給特區(其中一個)沒良心電視台寫的兩個毛筆字﹐「良心」﹐一個人能堅持這最低限度的的價值﹐誰說容易呢﹐特區七百萬人﹐又有幾人做到？
No comments:
Post a Comment