曹捷講咸古

聽說《兒凶》口碑很好﹐小弟便去看了﹐發覺又是一場虛驚﹐絕大部分嚇人伎倆﹐同黑天鵝差唔多﹐不外乎有個人影﹐突然標出來個隻﹐內涵當然係冇。我只可以說﹐《兒凶》零恐怖﹐都算有o的驚。現世人對何謂好電影﹐那怕是商業鬼片﹐太有需要檢討了。

塘邊鶴好驚

片子的毛病很明顯﹐係佢只有處境(兒子被鬼纏)﹐沒有故事﹐人物沒有背景﹐假設老公唔係教書先生﹐係做鴨既﹐老婆唔係作曲﹐係髮廊做洗頭既﹐佢地唔係有三個仔女﹐只得一個﹐重有同性戀傾向﹐對影片發展都沒有影響﹐更遑論任何心理刻畫了(童年陰影、心理壓抑云乎哉都係吹水)。

因為進入唔到人物的精神狀態﹐所以後半段男主角入了個幽冥空間搵仔﹐就只係係鼠打機﹐重要打緊90年代初Street Fighter I﹐想像力是零。成個撞鬼過程﹐毫無邏輯可言﹐例如主角要通過乜野手段﹐先能成功救番個仔呢？ 天曉得。

no rules即係冇form﹐就game不成game。無付出﹐無規距﹐一切隨心所欲﹐像保安局局長、警務署署長走上立法會﹐黑影幢幢﹐完全任up﹐觀眾席上的塘邊鶴﹐冇野可做﹐只能目瞪口呆﹐好似畀好多胡蕉噴霧包圍﹐總之好似好驚。悶過聽政制及內地事事務局局長狗up﹐我趁機睡了一會。

笑嘻嘻走左

《兒凶》精彩之處﹐係女主角唔靚﹐仍幾令人鍾意 (典解搵老公救仔﹐唔等癲婆搵仔﹐百思不得其解)。前半部拍日常生活﹐捕捉家居空間﹐從日常道具入手 (屋頂、baby monitor、封箱行李之類)﹐冇乜深度﹐但至少角色對白似人話﹐久唔久有o的鬼影漂來漂去﹐配上條女可圈可點的演出﹐張力十足﹐氣氛不錯。

全家搬去第二間屋﹐特別精彩：女主角聽黑膠碟﹐出外面倒圾垃﹐望番入屋﹐發現大廳有條侏儒背影。條女跟住係屋企猛搵隻侏儒鬼仔﹐居然係個鞋櫃撞到正﹐驚鴻一瞥﹐似遇非遇﹐觀眾從迷惑中甦醒之前 ﹐隻鬼已經笑嘻嘻咁走左。

ほら﹐相當impressive﹐手法亦佳：鏡頭由屋內追住條女走到外面倒垃圾﹐跟住條女的主觀鏡望番入屋﹐從一實(門隙/有鬼)一虛(窗門/冇鬼)的區隔﹐以似真還假開展﹐鏡頭調度非常正﹐一路追住條侏儒入屋﹐功力十足。鬼樣唔清唔楚﹐順便慳埋特技化粧費添。

舉不起細佬

小弟想到﹐肉帛相見﹐乜鬼都睇到一清二楚﹐又樂趣何在呢﹐異型第一集﹐成日黑媽媽﹐先係永恆的經典丫麻。搵Jeanna用把寸嘴為人民服務就應該者﹐陶傑又玩口技﹐聲演鹹古﹐聽眾上網一路聽﹐一路諗起佢個賣笑的衰樣﹐聯想到沈旭龜的金毛﹐鮑偉聰的七頭﹐賤吾的肥朣﹐劉細良的不知所蹤﹐5p亂交﹐不用耳聞目睹﹐思之非常惡心﹐不管是零零後的中小學生﹐還是五十後的蔡志森﹐典會叫得醒他們長短不一的細路呢。


《兒凶》的小聰明﹐是翻抄驅魔人、鬼驅人什麼的﹐但睇左半套你都唔覺﹐到神婆出場﹐搞呢搞路﹐你先發覺原來又係呢家野﹐但唔會覺得畀人滾左﹐重以為睇到「新野」添。結局狗屁不通﹐我想起糖心風暴 (「邊個係人係鬼﹐我一清二楚」)﹐也想起John Carpenter的The Thing﹐不同的是﹐人家至少在扮推理小說﹐在認真營造密閉空間裡﹐爾虞我詐氣氛啊。

只要爆和錢

但現世電影或各式藝文﹐誰管上文下理完整不完整﹐劇情講通不講通呢？ 誰會管行政長官有冇畀飯盒掟中﹐有冇報假案﹐律政師有冇浪費公帑呢？ 誰會管徐詠璇有冇需要為敗壞港大聲譽問責下台呢？ 出roller時﹐我旁邊的九十後們﹐「唔明喎、典解丫、好恐怖啊」﹐從他們熱烈的鬥嘴﹐我就知道片子成功了﹐一晚之後﹐facebook可能出現三萬條與《兒凶》相關的廢posts。現買現賣﹐夠爆就可以了﹐現世特區人除了爆和錢﹐什麼都不想要﹐包括人權法治、新聞自主。