瘋狂的人群

一、翻開今日信報,不出所料,己經連續三週,沒有陳雲的政經文字,他的<如何毀滅一隊警察>堪稱經典﹐現在只剩下劉迺強的屁文.而 "全城憤慨","全城含淚"這些字眼,竟然出現在信報報頭,我不能不感覺到信報的疑似失陷.

二、信報原來是讓人Far from the madding crowd 的一個避風港,現在唯一一片淨土,除了財經,想不到是他們的副刊,那些文啟明,黃珍妮之類的垃圾作者,還在反芻他們的"禁煙禁酒","尋晚睇乜碟"之類的垃圾話題,在非常時期,像賓佬貧童,登上垃圾崗尋寶找樂,反有逃離瘋狂的人群的寧靜樂趣.

三、MR.紀曉風,那些兒童樂園風的疑似新詩,還是別寫了吧,幾時先可以畀游清源寫番呢。

四、不知就裡的人,這星期看了特區報紙,可能誤會郭富城好紅: 全城含淚,全城憤概,全城怒吼,全城悲慟,全城戒備,果如是,傳媒可以告訴我,點解週日的遊行,只有可憐的八萬人參加?

五、小弟不幸身陷其中,多番考察群眾情緒,真心哀悼者不少,喧鬧如常的也很多,總體能量不高,向賓佬與國際社會施壓無從,實在感覺不到如何港人"空前團結",更遑論什麼向賓妹吐口水了,至少社民連班契弟和癲狗,就全部冇影.

六、相比汶川地震,今次最特別的,除了網上喧囂,整個文化界都口徑統一,同京奧那些萬人操差不多,既沒打手寫"天譴論",也沒才子寫"因果論"之類,很少獨立意見,只是同仇敵概,圍剿一個鳳凰台的光頭佬,這恐怕也是"全城效應"的一種吧,

七、萬宗歸一,其恐怖之處,是將所有不感到憤概,怒吼,悲慟的人,想理性思考問題的人,不認同全民參與的人,打成非我族類的人,標籤成無恥無恥無恥無恥無恥!!!!!!!!!的人.昨晚聽"光明頂",陶傑發狂抽水,指名道姓狂小鳳凰光頭佬,可見在這傳媒虛擬的瘋狂氣氛中,執輸行頭慘過敗家,落水狗非打不可,誰管打狗的是原來是人還是狗,不過是同室操戈呢.

八、當陶傑也放棄了當特區愚民的so-called opinion leader,與主流意見同化,23條成功立法之日,不遠矣.

九、"全城XX"或"全城yy"這文型,令人厭倦,內裡對異己者的排擠,更令人反感.我開始佩服張藝謀,"滿城盡帶黃金甲",單單滿城二字,就是藝術語言,試想換成"全城盡帶黃金甲",從應然變了實然,讀來就毫無生趣,與特區垃圾傳媒同一水準了.

十、23條通過後,呼籲政府禁止使用"旁觀他人痛苦"這幾個字,違者要罰睇英文版原著一次!

五十笑一百

消防救援後拍照

『另，拜託不要再轉載那些市民在現場拍照的照片來作針對所有菲律賓人的「證據」；某些香港遊客如何在外地的教堂、寺廟、墓地和戰爭紀念館喧嘩吵鬧，早已是「世界聞名」』
梁啟智
(武評:實在不用加"某些"二字,那是西化語言)

「我信有香港人看見這張照片時會憤怒，甚至想到報復，因為我初初看到時都有點火。但當我無端浮現好多香港人（當然包括游某人）去掃墓時有講有笑的場面，頓感釋然。」
游清源
(武評:有人認為歲月神偷是笑片,即使"大逆不道",也未至於要拉出來圍毆吧)


日寇又勝一仗

停止抽水吧

一、六點鐘起身﹐第一句有人問我既﹐係「死左幾多人丫」﹐你可以點答呢？ 等於六四有幾多人被解放軍殺死﹐重要嗎？ 呢種問題﹐一早我放狗時﹐從街坊耳語﹐已聽過無數次﹐同人地問你掛緊幾號風球﹐駛唔駛返工差唔多﹐這顯然又是「數目字管理」的問題﹐即係死人越多﹐人們流露的悲傷﹐應該按比例增加 etc。按這邏輯﹐就解釋了昨晚7:30左右﹐傳出全車人死晒的消息﹐傳媒幹嗎咁亢奮了 - 全車死尸﹐明日民情不是應達沸點？ 報紙一早賣晒？ 社民連帶頭攻擊菲律賓領事館？

二、剛看了一點NOW新聞﹐訪問梁太太﹐好似好慘﹐老實說我已有點想揞眼﹐跟住再訪問一個留院死剩的十五歲小妹妹﹐記者旁述一開始就講﹐「佢父母瓜晒﹐但個妹妹就唔知o個喎」(大意)﹐真係夠晒dramatic丫 (電視台高層尖叫中)﹐好睇過喊苦喊忽的星光大道丫﹐然後個記者暱係個鏡框外面﹐個鏡頭一路追問個妹妹「你感受點丫﹐你知唔知你屋企人點丫」 (大意)﹐妹妹越答得平靜(佢唔知自己冚家富貴)﹐觀眾就越覺得精彩﹐這不是赤裸裸咁rip-off個妹妹﹐這不是旁觀他人的痛苦﹐又係乜呢？

三、黃毓民、司徒法正﹐還是停止抽水吧。

四、我始終思疑﹐比起死左幾多人﹐好多特區人更關心的﹐是應唔應該趁旅行社跳樓價﹐暑假尾去菲律賓旅行。

五、老實說我的感受﹐好像比我應該有的﹐少得多﹐胡扯完畢﹐希望沒浪費你我的時間。最後﹐不去理解班賓佬對整件事的看法 (例如佢地個社會點看待恐怖活動﹐新任總統和政府管治文化﹐警隊管理貪污現實﹐賓佬綁架史之類)﹐只一咪妖魔化佢地 (草菅人命﹐庸碌無能什麼的)﹐只會繼續增加人際間的誤解和仇恨。



巴士綁架療傷電影﹐相信比食屎疴飯的心理醫生有效

翻臉不認人

電視作者已死?
卜土廿手
明報 2010-08-15

以上真是一篇怪文﹐作者叫觀眾睇TVB的電視劇時﹐認下誰是「作者」喎﹐即使出自好心﹐恐怕還是比叫《施公奇案2》歐陽震華找誰是兇手更弱智吧。小弟想起聖經的故事：耶和華叫阿伯拉罕去罪惡之城Sodom﹐搵十個好人﹐只要搵到﹐耶和華就會改變初衷﹐唔會將座城毀滅﹐結果阿伯拉罕徒勞無功﹐Sodom都係要冚家牆。

去雜差房玩認人

特區人品格的墮落﹐智力的衰退﹐TVB係一個好重要的象徵﹐是萬惡之源的源頭﹐問題係﹐過去二十年﹐除了奇才韋家輝﹐涉嫌貪污被捕的陳志雲和錢國偉﹐TVB出過邊個你認得出的「作者」呢？ 走去雜差房玩認人﹐個個犯都髮型似謝霆鋒﹐身裁似蕭若元﹐臭口似黃毓民﹐縮骨似曾蔭權﹐點認得邊個「衰十一」呢？

去自家烏冬羅張贈券睇《翡翠明珠》﹐到底「作者」是蔡卓妍、林峰、樂易玲還是容祖兒﹐你又唔係邵逸夫﹐你有權管嗎？ 你又管得了嗎？ 好似怪文咁講：「《野蠻奶奶大戰戈師奶》被稱為《我的野蠻奶奶》時裝版，又有誰發現連監製也被換掉？」 我就想反問啦﹐有人睇得出換左監製﹐咁又如何？ 對培養觀賞之道﹐會有幫助嗎？ 「認台徽」﹐非常合理﹐認住BBC world news﹐認住Cable新聞﹐信心保證﹐又錯在哪裡？

數目字不可能管理

怪文兼論日劇﹐「收視首開僅得10%，最後平均只得8.8%，當季收視排行榜尾四」、「當季的日劇學院獎顆粒無收，更被2CH電車男選出為『金酸莓獎』的最爛劇本」﹐聊聊幾句﹐就凸出了華人觀眾的凸點： 好鍾意將評議變為「數目字管理」(例如口碑點差點差﹐視聽率點低點低)﹐以支持佢地評析的無能為力﹐而佢地永遠都唔明白﹐只要還是對日劇抱有些微的信心﹐經得起披沙瀝金﹐藝術作品﹐本來就係numerically unmanageable的。

問題係﹐你既然叫得人係「作者」﹐即使層次未必一樣﹐同高達、龍剛、杜琪峰、安哲羅普洛斯都應該有可堪比較之處﹐Sight and Sound的影評視評都未必看得上眼﹐咁佢也未至於墮落到同「2CH電車男」、「高登潘小桃」、「uwants fing頭狗」一般見識吧﹐佢地up乜春﹐又關人隱事呢？ 「日劇學院獎」﹐你估係金棕櫚獎咩﹐除左隔離屋個肥婆四﹐評審到底係邊個﹐佢有咩藝術識見﹐唔該講清楚。

男兒志在四方

野島近來的日劇﹐老實說我沒看﹐怪文話喎﹐「得不到本土的青睞」﹐「受到不少海外日劇迷熱捧」﹐咁咪幾好﹐伊朗的阿巴斯、日本的黑澤明、韓國的金基德都係咁既﹐男兒志在四方﹐作品高下﹐歷史自有見證﹐假如末了證明唔掂﹐《世紀末の詩》不像《柏林阿歷山大廣場》﹐沒被編進Criterion Collection售人民幣800元﹐野島也會坦然接受吧。至於那些電車男﹐さつえいオタク﹐カメラこぞう﹐去死吧。

一週一健談 #14

茶餐廳的齋啡涼了竟然不酸
游清源
信報財經新聞
2010-08-03

在沒有世界盃沒有歐聯沒有英超沒有西甲的半夜三更，二十四小時營業的茶餐廳是這樣經營下去的（先此聲明，夜更的士車租比日更還要便宜一成，這件事就足以證明，香港的夜生活早已遇到黑色暴雨，即使沒有沒頂也長年水浸眼眉）。

公司附近（北角渣華道與琴行街交界）有一間茶餐廳叫「有您有我」，與天后水星街的「不見不散」，以及英皇道國都商場對面的「先到先等」應屬同一集團或者起碼有些少「親戚關係」（「先到先等」和銅鑼灣道聖保祿醫院對面的「不見不散」都已拉閘，化為爛gag可以是「不見不散」變成「忽見忽散」，而「先到先等」則變成「後到唔等」。我甚至諗過自己也搞類似的通俗詩意茶餐廳，第一間叫「我行我素」，第二間叫「我行你素」，第三間叫「你行我素」，第四間叫「你行你素」，第五間循環再造加懶音，變成「我『痕』我素」，如此類推，一直開分店開到可以上市，跟手就叫畢非德或者李錄入股，呵呵呵，呢鋪真係想窮都難囉）！

上周六凌晨四點十五分，一個人傻更更去「有您有我」，那裏有一個大廳兩個偏廳，長方形的大廳大約有十五張枱，四部電視各踞一方。這個格局我熟到盲了都看到，奇就奇在四部電視播着不同節目，第一部播粵語殘片《白骨美人大結局》（即是《無頭東宮生太子》下集，那個無頭東宮即是白骨美人亦即是另一個「阿珍」余麗珍），第二部播韋家輝監製的《世紀之戰》，第三部播李連杰主演的《黑俠》，第四部播劉德華主演的《賭俠大戰拉斯維加斯》，都是重播，卻又令老中青夜貓子各取所需，如在沙灘拾貝般拾到一點生趣，如是者喝下一杯奶茶，再來一杯咖啡，再來一杯鴛鴦……而我只是叫了一杯齋啡，獨個兒坐在四部電視的中間位置，忽然之間有個中年侍應打招呼。因為他笑，露出一張缺了三顆門牙的嘴巴，讓我記起他在年前結業的另一間茶餐廳做過。這裏很好，果然是「有您有我」。

歲月不饒人

Inception﹐可能是史上最被過譽電影。有趣的是﹐它的被過譽﹐與其說是影評人的吹噓﹐倒不如說是網絡愚民集體發功的愚人力量。過去幾十年﹐有咩電影﹐係未開畫( ! )之前﹐已經有人大吼大叫係超時代經典？我要睇多幾次？從未有過吧﹐就算係教父﹐係8部半﹐係閃靈﹐係去年在馬倫巴﹐係東邪西毒﹐係站台﹐係戲夢人生﹐係斷了氣﹐係阿培三部曲﹐係感官世界﹐係浮雲﹐係情隔萬重山﹐係西遊記上下集﹐係天國與地獄﹐係安德烈盧布耶夫﹐係恐懼蠶食心靈﹐係春風吹又生﹐都從未試過這樣吧。

網民琉璃心

以上呢的電影﹐被人柴台擲蕉的﹐反而不少﹐經過歲月洗禮﹐十年二十年後﹐價值才慢慢被肯定﹐要讚係經典乜經典物﹐至少都要等套戲落左畫先丫﹐真係歲月不饒人到呢個地步？ 最反智的﹐係有個人o係淫賤雙周﹐畀Inception 一百分﹐竟然成為網絡熱話﹐問題係﹐畀一百分既﹐係李焯桃﹐係Tony Rayns﹐係Pauline Kael就話者﹐就話有參考價值者﹐不過係個垃圾「影評人」﹐有咩咁值得興奮呢﹐網民需要被認同的心靈﹐真係脆弱到琉璃一樣的地步？

Inception另一個特別之處﹐係我幾乎冇聽過有人話睇唔明﹐連Memento咁淺白﹐我都聽過有人話唔明﹐Inception我只係聽過港台《風騷快活人》有個白痴主持話唔明。我只想說﹐真正博大精深的藝術作品﹐好少係一睇就明既﹐或一睇就睇得通既﹐例如同樣講夢中夢中夢既港片《再生號》﹐惡評如潮﹐就相映成趣﹐又例如楊德昌導演講過﹐佢中學時睇8部半﹐連睇四次先睇得明﹐等於踢世界杯﹐巴西波好睇阿茂都知﹐西班牙好係邊呢﹐就唔係水過鴨背的淺人識得欣賞。

機關算太盡

Inception本來係可以拍到好深奧既﹐但機關算盡太聰明﹐作者係將套片砌到好功能性﹐完全依足商業片方程式砌出來﹐問題係所有野都係意料之中﹐好超悶﹐例如開頭李安納度走去疑似非洲搞搞震﹐我就無名火起﹐手搖鏡震下震下﹐好緊張丫﹐咪又係《叛碟追擊》羅﹐咪又係當的非洲人係傻架羅 (假如你「解讀」為發夢﹐係李安納度或whoever係戲院睇過《叛碟追擊》﹐然後發過一樣的夢﹐隱喻漆黑中戲院觀眾和銀幕映象的鏡象關係﹐小弟無言以對)。

Inception 最致命的問題﹐是佢大鑼大鼓咁去講發夢﹐但表達得好rigid﹐創意好低﹐敘事好工整(所以人人睇得明)﹐完全冇什麼「意識流」﹐好「理性」咁去架構夢境(而同主人公心隨意動﹐天馬行空隨意勾勒完全不符合)﹐數學家咁計晒數﹐幾乘幾夢中時間延長如何如何﹐結果反而推倒左夢境的曖昧性和不可理喻。

潔癖偏執狂

另一方面﹐佢要講精神壓抑引發角色心理異變﹐又講得好膚淺﹐最慘當個twist來玩﹐連melodrama的水平都去唔到 (不妨比比史高西斯劇力萬鈞的Shutter Island)﹐重要分兩條戰線 (李安納度和二世祖)﹐當然完全唔令人感動﹐卡通片新世紀福音戰士﹐先至算用映象、節奏、構圖、意象表達到意識心理層面。假如Eva是說榮格﹐Inception是說弗洛伊德﹐相對前者的汪洋放肆﹐後者的乏味﹐正是來自作者的謹慎﹐他就像有潔癖的偏執狂﹐連丁點的弗洛伊德的失語 (Freudian slip)﹐都要剔除。

Inception的視覺創意在哪裡﹐我完全睇唔到﹐有個人係天花板度行﹐幾十年前Jean Cocteau拍過了﹐發夢什麼的﹐我只建議觀眾去看費理尼、阿倫雷奈、甚至布紐爾的電影﹐講心理創傷﹐同樣是荷里活片﹐Shutter Island好得多。

PS.我從未看過Matrix﹐保證絕無偏見。

蝶戀花柳永

聽左呢段錄音﹐有助了解班契弟的本質。不談正事﹐調侃陳碧鏵「整容」﹐議論伊皮膚「硬度」﹐本來就政治不正確﹐將佢比喻做妓女﹐扯到「生花柳」﹐就更下流。蕭若元話喎﹐「如果陳碧驊去做妓女呢﹐就大鑊啦」﹐問題係﹐陳碧驊有正當職業﹐薪酬不少﹐點解佢要去做「妓女」呢？ 假如有人話﹐「如果蕭若元兩個女去做妓女呢﹐就大鑊啦」﹐咁蕭若元兩個女屋企咁把砲﹐又讀國際學校﹐點解佢地要去做「妓女」呢？

「做雞咩客都接﹐咁爛做﹐必然生愛滋生花柳啦」(大意)﹐楊千嬅教落﹐只要做足安全措施﹐就算做壞副偈﹐都唔見得會生性病。照佢既「邏輯」﹐日本個o的AV男優女優﹐例如加藤鷹、向井朱古力波﹐咪應該個個生愛滋？例如陳果導演《榴槤飄飄》﹐秦海璐演的小燕南來賣淫﹐「爛做」到令人肉痛﹐也唔見得佢後來生花柳。再者﹐我唔相信有做雞的﹐會心甘情願咩客都接吧﹐好似蕭若元咁一臉橫肉﹐體胖如豬的阿伯﹐摸手摸腳都污辱﹐問心誰都不願接吧。

好多人唔明白﹐典解長毛會咁「陰毒」﹐咁鬧華叔﹐事後畀人圍剿﹐長毛都唔肯道歉﹐打打圓場都唔肯呢。證明佢地個網台﹐聽眾不多﹐只要稍為聽下﹐一切就清楚明白﹐千方百計去羞辱人﹐淫笑一番﹐就係佢地的本性﹐也是吸引不學無術的盲毛支持的手段。你叫長毛「認錯」﹐等於叫佢自斷一臂﹐染個金毛﹐或者剃個鬼剃頭﹐立刻失去力量。假如鬧人「cancer上腦」﹐都算超越了特區的「道德」界線﹐咁蕭若元鬧陳碧驊「生花柳」﹐個網台係咪應該解散呢？ 尤其係癲狗﹐應該日日要向人叩頭謝罪。