20071003

春光映畫



呢套戲好悶﹐講東講西﹐淨係見的甘草演員走來走去﹐比清談一點鐘好些﹐但完全冇佈局﹐個導演成日遊離浪盪﹐但冇諗清楚想講乜﹐咁呢樣都係平常事﹐正時時下港燦青年導演通病。叫做偶有佳句﹐但比《妄想》差好多﹐因為劇本好差﹐對白唔係人講﹐個主角性格空過張之洞﹐後黎好似填充咁﹐夾埋拖埋佢失蹤卅年的老豆老母落水﹐又喊又盛﹐真係硬膠得很呀。你要講個偵探平凡笨實﹐咪學下Zodiac咁羅﹐一樣可以讓人悶中作樂架﹐可惜作者心大心細﹐對人性冇了解﹐又唔抵得悶﹐又要搞連場動作爆破﹐又要煞有介事講o的「金田一式」(重要係漫畫個隻)恩怨情仇﹐超﹐得出個結論﹐都不過係阿媽係女人。

我真係登城城悽涼呀﹐佢本人已經又戇居又蠢﹐你又叫佢做埋呢的又戇居又蠢的角色﹐咁佢咪又戇居又蠢乘2羅﹐咁盞人地咪重憎多佢兩錢重﹐你知的港燦心理變態﹐唔抵得的神童﹐成日想拉弓射大鵰﹐將的星之子一個二個射落黎﹐明明自己又貪心又笨實﹐又淨係識憎的又戇居又蠢的人架麻。你以為搵個又戇居又蠢的人﹐做個又戇居又蠢的角色﹐就等於perfect casting啦羊﹐我話畀你聽﹐係錯呀﹐城城真係做得好差呀﹐佢露晒底啦﹐你個角色寫到咁差﹐你等佢自己發揮﹐佢邊識先得架﹐佢真係戇拾拾咁照讀﹐偶然擺的歌星有型甫士﹐放下電﹐咁邊得架﹐咁邊夾架﹐你估佢係梁朝偉呀﹐佢無讀過訓練班架。

其實套戲係有細緻o的既位既﹐但都係縮頭龜﹐伸唔到個頭出黎﹐例如城城成日冒警﹐又被智叔鬧「白癡仔扮偵探」﹐佢咪自己都唔知自己做乜春羅﹐又唔係人(差佬)又唔係鬼(偵探)﹐咁你再講番佢身世之謎﹐都可以好感人架﹐都可以話係自我追尋架﹐都可以自圓其說到點解佢咁obsessed with單案架﹐都可以係一套別開生面既藝文偵探片架。先旨聲明﹐唔好話我爆橋呀﹐結局咪又係玩o的鬼影幢幢﹐「你見鬼呀」個家老本行﹐當然你可以好巴閉﹐話呢o的係high concept混合類型﹐真係出人意表呀﹐咁呢個咪係你失敗之處羅﹐失驚無神原來見鬼﹐你直頭係反科學﹐反文明﹐反進步﹐反社會﹐反民主啦(主角不停影相﹐是系統化搜集資料的工序)﹐張相不斷放大﹐就會見到鬼影﹐你撞著呀死鬼安東尼奧尼呀。

3 comments:

400blows said...

ahmo

(clap clap clap)

thanks
400

Anonymous said...

基本上我同意哂你講既野,都登城城悽涼,不過要佢做埋D又戇居又蠢的角色,作為fans,反而產生左一種由憐生愛既感覺。對不起,打擾了,不過真係忍唔住要護短。

阿武 said...

謝謝您的「同意」。
我幾鐘意城城架。