呢套話題紀錄片Jodorowsky's Dune﹐談邪派高手Jodorowsky在70年代籌拍科幻片Dune如何失敗。
錯過了﹐download看完﹐覺得這是一部真正的「影展電影」﹐專供所謂影癡觀看﹐作互吹的談資﹐滿足自己的虛榮。假如小弟係o係Arts Centre睇﹐可能都會覺得high﹐幸好我唔係﹐於是更清醒。
一、決戰光明頂
Moebius
呢位邪派導演Jodorowsky其實幾似邪教教主﹐講埋o的野誇過浮誇﹐虛過太虛﹐給你偉大的遠景﹐要拍一部改變人類歷史﹐改變人類文化路向的電影云云。至於咩叫改變﹐典做先能改變﹐真係天曉得。簡直比要香港人醒覺﹐一起推翻中國共產黨更虛無。
原理同睇王家衛差唔多(如《東邪西毒》)﹐Jodorowsky搵埋班好似好勁的人一齊製作(你自己睇啦﹐都無謂數啦)﹐投資好多好多錢﹐總之佢咩都先知先覺﹐快人一步﹐Star Wars之類俗品就係受佢影響﹐《2001太空漫遊》一類﹐就東拉西扯踩幾腳.....
套紀錄片重點唔係講Jodorowsky想拍咩、典拍﹐係講佢典誘惑、操縱、誘騙好多名人、文化偶像下海﹐應承拍佢呢套劃時代大作Dune。逐個逐個大名鼎鼎的名人﹐包括Dali、Orson Welles都逐個逐個登場﹐成了獵奇的奇聞逸事。呢個就是此片最有影展feel的地方： 文化名人輪流出場﹐頭頂煙花爆放﹐影癡嘩嘩嘩。什麼叫偶像效應﹐一言蔽之﹐就係juicy。Manson Family咁吸引人﹐唔一定係個教主有咩了不起﹐係因為同Beatles, Beachboys, 波蘭斯基有關﹐於是八卦迷就興緻勃勃。
套紀錄片最好o野﹐係將Dune個storyboard變了電腦動畫﹐效果花肖。明明冇拍﹐但又好似變o左係真﹐於是觀眾就誤會睇過套戲﹐重好似好好睇添 (其實係咪改拍卡通好o的？)。不斷抽水、附會﹐個Storyboard畫主角斷手﹐即係影響了Star Wars啦﹐Jodorowsky唔知﹐其實重影響埋香港的肥良添呀。
Jodorowsky比王家衛更犀利﹐王君都要拍丫(即係要承受失敗的風險﹐重要準備畀人小到反艇)﹐佢根本唔駛拍﹐吹下水搞掂。講到尾﹐同睇電影節的原理一樣﹐鬥快鬥多鬥早﹐吹到天花龍鳳﹐然後追捧各類文化偶像﹐數完人頭﹐簽完到﹐就滿足了高級觀眾的虛榮。
大衛連治o個套變了「失敗」﹐佢呢套一秒鐘都冇拍到﹐反而「成功」﹐世事如棋呀。
二、異端如何被收編
Giger
與其話呢套拍唔成的Dune﹐片子的意象和創意﹐影響了後世其他科幻電影﹐倒不如話呢套紀錄片Jodorowsky's Dune的本質﹐其實係想講異端如何融入主流﹐而荷里活又用咩方法將另類人物收編﹐然後給全世界的觀眾﹐製造一種世界有進步的幻覺：
荷里活最初抗拒Jodorowsky﹐但最終都畀呢本Dune的storyboard感化了﹐好多禁區慢慢都撤走了﹐好多Jodorowsky先行的觀念﹐都被襲用了。即使Dune明明拍唔成﹐但Jodorowsky的「夢想」(教化世人、改革電影)﹐亦不知不覺變成真實。即係話﹐呢個腐朽的世界(荷里活的隱喻)﹐都唔係冇改變o既﹐希望在人間。
紀錄片Jodorowsky's Dune﹐就係推銷緊呢套荷里活的幻覺： 只要不屈不朽﹐就能夢想成真﹐失敗者變成功。完全符合荷里活電影想麻木觀眾的意識形態。荷里活拍一套紀錄片Jodorowsky's Dune﹐Jodorowsky本人又會現身說法﹐其實o係度互相「消費」﹐編寫緊異端與主流水浮交融的荷里活美夢：
荷里活利用一個失敗者Jodorowsky﹐證明自己其實好開明 (連Star Wars、Spielberg都係抄佢﹐又何異於整個現代荷里活流行電影體系﹐向Jodorowsky認祖歸宗？)﹐而Jodorowsky認多一百幾十個徒子徒孫﹐重有機會狂踩David Lynch幾腳﹐證明自己先係電影先知﹐出入另類主流之間﹐重入主流電影史冊﹐亦卻之不恭。
最tricky的問題是﹐Jodorowsky根本唔係「失敗者」呀﹐幾廿年來﹐佢從來係cult片之王呀。佢班同袍﹐後來個個名成利就﹐羅埋奧斯卡金像獎呀﹐幾時有「失敗」過？於是所有人都企o係不敗之地﹐o係度扮失敗﹐扮Beautiful Loser﹐呢個世界﹐有冇咁著數o既事先。
"I was convinced that it would be somethin' great."Giger幾廿年後重估呢段籌拍Dune「電影」的經驗﹐是最佳結語。
跟高達的名言﹐cinema is the most beautiful fraud in the world 對照﹐更覺妙不可言：
Jodorowsky的Dune﹐所以是「最美」的騙局﹐不為什麼﹐因為冇拍過﹗
No comments:
Post a Comment