佢死得好慘

在我而言﹐《高舉愛》有場戲幾震撼﹐杜汶澤o係西灣河so-called Soho對出﹐畀架貨車撞到仆街﹐成地血﹐畀車壓住﹐佢老婆舉重運動員江若琳﹐發晒癲﹐又哭又叫﹐好似變形俠醫(綠色個隻怪物)咁﹐踎低用兩隻手翻兜﹐要托起部車﹐拉番老公出黎。結果梗係拉唔出啦﹐杜汶澤眼坦坦﹐嘔多幾錢白泡﹐個女人愈是發癲﹐佢死得愈慘。

呢場戲﹐呼應了江若琳引用的希臘神話﹐Hercules為了讓某君去採金蘋果(隱喻讓江去做運動員入共匪國家隊)﹐一力承擔﹐由佢(比喻杜汶澤)頂住個天﹐掃地煮飯還錢什麼的﹐由個男人搞掂﹐萬大事有佢。這是對希臘悲劇的新體會﹐真正的英雄 (杜汶澤)﹐是潛伏的﹐是低調的﹐是無人知曉的﹐英雄的冒險﹐毫不驚人﹐沒有一劍斬死癲狗什麼的﹐不外乎日常瑣事(煮飯唔記得落水、癲佬公園搵仔之類)﹐但於無聲處顯驚雷﹐佢出乎意料遭遇橫逆﹐悲劇的源頭﹐不是知其不可為而為的反高鐵﹐只是人命紙咁薄﹐本來很脆弱。



江若琳要拉杜汶澤出來﹐無功而還﹐個男人反而死多幾錢重。個女人一路自以為了不起﹐力大如神﹐佢自恃的才能﹐在悲劇面前﹐毫無作用﹐在天意面前﹐人無法不靈光一閃﹐看見自己的渺小﹐思考除了飲紅酒﹐飲咖啡，查下車，打golf，千衹咪去旺角食雲吞麵以外﹐到底生命有什麼意義﹐陶傑晚晚搞盛女﹐典解我日日要去舉鐵。老公重要﹐定金牌緊要呢﹐個衰佬死左﹐重死得咁慘﹐你幫共匪羅左個倫敦奧運金牌﹐又如何呢。回首前事﹐全無意義﹐一片飛灰﹐不作浮塵﹐當凌絕頂﹐與夷俱小﹐此之謂人間交差點。

條女苦練了十幾廿年的絕技(舉重)﹐其實係無用的。小弟寫了十年的blog﹐其實係無人睇的。也許因此﹐這場戲令我有點震動吧。