20101125

出火豬籠車


昨天看了Social Network﹐想起很多年前看《柏特娜的苦淚》﹐結果講個女助手決定離開﹐女主人苦苦留佢﹐助手還是執包袱say goodbye﹐背景音樂響起The great pretender﹐當時小弟覺得有點over﹐作者對女主人的調侃﹐不是表達得太obvious了嗎﹐還好Freddie Mercury的演繹有點camp味﹐後來我漸漸明白﹐個女主人係法斯賓達自己﹐首歌係點畀佢自己聽既﹐到底是搞藝術的﹐還是有點自覺的自省吧。

又姣又怕痛

假如法斯賓達結局播首歌算直白顯淺﹐David Fincher係結局播披頭四的baby you're a rich man﹐恐怕只能說是膚淺吧﹐------銀幕上一連串字幕﹐甲乙丙丁各人從facebook處分到幾多幾多銀紙﹐耳邊約翰連濃唱Baby you're a rich man too, Baby you're a rich man too, what a thing to do﹐用文字寫出來都唔夠﹐重要強逼觀眾用耳仔聽埋﹐電影導演閣下﹐不是畫公仔畫出腸得太幼稚了嗎? 請別告訴我﹐首歌係trent reznor揀既。

Social Network另一個觸目之處﹐係裡面赤裸裸的male chauvinism﹐我真係好疑惑﹐典會有女觀眾覺得呢套片好睇既呢? 一開始有班女坐住架自由行豬籠旅遊巴﹐坐去Phoenix club(?) 畀人出火﹐已經非常可怕﹐後來主角兩條茂利搞facebook出了小名﹐立刻有兩條蕭小姐自動獻身﹐慾火焚身咁拉佢地入去男廁廁格度﹐由心口嘴落去然後吹蕭喎﹐吹完之後重有冇下文我唔知道(亦唔想知道)﹐因為畫面冇拍出來(其實被吹既係咪主角都唔知)﹐驚青到咁﹐又拍來做乜呢﹐呢的咪又姣又怕痛羅。

真係好好笑

依我膚淺的閱人經驗﹐個兩條蕭小姐都係少數族裔﹐其中一條係美國電視劇常見的native speaking的american chinese﹐假如換左係藍眼睛的金毛﹐至少係美國市場﹐恐怕會引起公憤吧。Social Network最特別的﹐係個世界好似好人慾橫流﹐所有係套戲裡出現的女人﹐包括那些facebook intern什麼的﹐除左令人倒胃的律師外﹐都係用來出火的(還是under 21的)﹐但兩條主角﹐其實係無性生活的(除了吹蕭一場)。主角溝唔到o個條erica﹐典解咁重要﹐除左畀女觀眾投射情緒(扮上菜我好高貴)﹐也是讓老人(編劇和導演)們自我安慰的工具﹐扮理解新新人類從網絡衍生的新新類型人生活﹐然後對佢地作出最無情的嘲笑:o的女全部係我地架﹐食免費殘廢餐啦你﹐起唔到頭丫你。

Social Network係一部淺薄的電影﹐係職業技工的作業﹐劇本尤其係堆砌而失焦﹐例如o個兩條划艇的茂利﹐重要係疑似孿生的(真係好好笑丫﹐哈哈哈哈哈)﹐所謂Harvard的君子﹐佢地製造的種種活地阿倫式的「笑料」﹐就係典型扮知識分子電視劇的調侃上流人士手段﹐純為設計兩場對簿公堂戲而堆砌出來﹐兩個卡通人物﹐放係真人電影就係唔work﹐只會令影片的真實性盪然無存(阿叔﹐你拍緊「疑似傳記片」丫﹐咪唔記得先得架)。

煩過你阿媽

Social Network也是一部無夢的電影﹐無靈魂、無血肉﹐無理想﹐拍唔出網絡世界令人癡狂的夢幻迷醉﹐更遑論對真實與虛疑世界有無哲思﹐電影將主角一切行為的理由﹐解釋為溝唔到女﹐的確是一種好方便﹐適合頭腦簡單觀眾的處理。究其實﹐性愛、面子、股票與錢﹐不過係外衣﹐真正令人著迷的﹐是權力﹐權力係more seductive than sex, more addictive than any drug, more precious than gold (sydney lumet)﹐影片淺嘗即止(聽完bill gates演講有人問羅簽名)﹐只說明編導的虛偽﹐根本看不起筆下的主人公(好有錢的電車男)。

Social Network以溝(唔到)女始﹐以溝(唔到同一條)女終﹐就注定佢係一部平庸的電影﹐睇唔到主角的夢想 (典解佢要搞咁多野呢?)﹐睇唔到主角的個性﹐兄弟情無從說起 (因此facebook創辦人七到冇朋友的irony就不成立)﹐佢唔食煙﹐唔飲酒(除了啤酒)﹐唔賭錢﹐唔嫖妓﹐唔睇書﹐唔睇碟﹐唔隊草﹐唔好笑﹐甚至唔打波﹐唔遊水﹐唔打飛機﹐唔(識)溝女﹐真係想問句﹐你點解唔死鬼左佢呢。除了衣著有少少唔同﹐成套戲由頭到尾一樣﹐淨係見佢嘴o者o者﹐講野快過馬田史高西斯﹐但毫無neurotic的感覺﹐阿哥﹐我真係覺得你好煩﹐煩過你阿媽。

1 comment:

400blows said...

豬籠車,【山狗】片頭都好似有一部。