水流廢柴

傷台有兩條廢柴議論呢套戲﹐話日本鉅變後﹐草剪剛逃難英國前夕﹐不遠千里去搵堅持留o係日本的消防員柴崎幸﹐二人渡過最後一夜﹐柴崎叫草剪同佢造愛﹐廢柴話睇到呢處﹐已經覺得好好笑﹐點知草剪不但冇除埋底褲拔劍上馬﹐重強忍淚水﹐當面拒絕柴崎的性要求﹐令廢柴和戲院觀眾一同拍掌哄笑云云。其實觀眾忍住幾分鐘笑聲﹐好快草剪已經講明佢點解拒絕同柴崎交合﹐因為佢即刻就要參加一次自殺式的潛艇任務﹐幾乎必死無疑﹐佢所謂「逃難英國」﹐其實全是謊言﹐咁佢又點為一己私慾﹐去「玷污」左呢個佢愛的女仔的清白呢？ 廢柴天天圍吃垃圾﹐關注「特別部位」可有現形﹐當然欣賞迷姦姑姑的尹志平﹐也覺得日寇呢的潔身自愛的價值觀好老土﹐佢地也永遠唔會明白﹐這其實是一種非常古典的﹐是一個準備荊軻的日本男人﹐對自己人格操守的最低要求。

廢柴咁都可以淫笑一番﹐咁睇到後來柴崎幸好似天若有情咁﹐騎電單車﹐撲去機場見草剪最後一面﹐咪更加要笑到嗌佢老母？ 觀眾要留意﹐兩位主人公百分之九十的時間都著整齊制服﹐到了最後一刻﹐互相擁抱後﹐草剪係即刻跑上飛機出發﹐柴崎亦哭啼過後﹐亦立刻騎車離去﹐即使到了永別時候﹐佢地都係要即刻返回自己的工作崗位﹐所以最後一個鏡頭﹐柴崎幸從直昇機拉住繩吊落去災場救人﹐佢知道草剪殉難﹐一邊流淚﹐佢都會立刻向傷者自報身份﹐因為佢是公僕﹐佢要先向國民負責﹐當然廢柴可以認為佢地咁樣泯滅「人性」﹐比拒看阿嬌BRa解不可思議﹐是曲線「軍國主義」什麼的﹐但我更相信這是日本人仍然推崇在私人利害面前﹐尊重自己專業 (profession)的每一個人。緊隨波罅、逐水而流﹐我相信以恥笑別人的堅持和信念﹐來明目張膽展示自己的苟且和墮落﹐的確是特區廢柴間很流行的一種症候。