心盲眼未盲

鬼眼

好像很少人注意﹐《盲探》其實是鬼片。

白痴大陸差佬﹐是司徒法正細佬 (司徒法寶)﹐不過小焉者。《盲探》主要的plot﹐女人因為被遺棄﹐而起殺機﹐不是切J﹐就是落鑊﹐化成厲鬼﹐隱慝暗處﹐殘惡的血﹐一代一代相傳﹐從民間傳說、章回小說開始﹐以上完全是亞洲鬼片的基本結構。

末了大肚婆幕天蓆地生仔﹐正是《瘋劫》劫局﹐一光明一黑暗﹐《盲探》只能以最良好的善意﹐替女人的「邪惡」﹐略作調解而已。

《盲探》的創意處﹐是毫不性別主義﹐並置了男人的處理方法。開場的痴肥旺角镪水魔﹐老婆勾佬﹐佢冇上門斬人﹐反而像韓片《殺人回憶》﹐用反社會的手段﹐對時代作反抗。

《的士司機》也是很好的對照點(別忘了司機位倒後鏡劉華的眼神)﹐羅拔特尼路自覺被「遺棄」﹐上門搞過條女一次就算數﹐絕冇殺人放火﹐要人「雞犬不寧」什麼的(結局的士再遇﹐Travis重相當善意)。佢明明唔想做人﹐行剌司徒華也好﹐強姦戴卓爾也罷﹐也要選擇更有「意義」的自殺方法。

淺人話劉華查案沒邏輯﹐不過表錯情。佢不過不斷同o的死人傾偈而已﹐他不是偵探﹐他是靈媒﹐他是鬼眼的小童﹐也是Peeping Tom的阿婆。

Peeping Tom

《盲探》另一創意﹐是將唱K混合查案。

劉華和Sammi不斷摸擬死人經驗﹐摸倣殺人過程﹐其實就是「唱K」：用二手虛擬經驗(種種慘人無道的失戀經驗)﹐到達一刀插入你心﹐一條一條血水四圍標﹐哎哎哎、鞋鞋鞋的終極高潮。殺人(潮退)過後﹐下半身濕晒﹐港女就能得到解放﹐愈唱愈強﹐入房沖涼﹐就能從新上路了。

《盲探》最笑中有淚﹐是Sammi不斷變身的快速蒙太奇﹐她不斷幻變各種死人身份﹐空姐、Rock友、宅女﹐然後作出種種瘋狂行徑﹐打碎結他、狂食、狂哭、狂叫等等﹐除了調侃《長恨歌》(入戲出唔返黎)﹐其實Sammi係拍緊MV。末了佢以為出返黎﹐不過入返第二套戲(劉華)而已。

而到達最癡迷的彼端﹐像柏芝﹐Sammi自殘身體：紋身﹐紋上「永遠最愛華倫天奴」 --- 華倫天奴可以是名牌(即是錢)﹐也可以是道聽途說的虛疑人物。《盲探》聰明處﹐條女不是一般港女﹐是龔如心﹐佢好有錢﹐於是佢唔要華倫天奴﹐佢要回到現實﹐要「愛」。劉華示愛時﹐話條女penniless都愛佢﹐當然全片最超現實的騙局了。(蘇珊咁既樣wor)

劉華通過不斷毆打Sammi(推佢落樓梯之類)﹐催逼佢短時間經歷各種慘情自毀失戀經驗﹐就是心理學說的「移情」﹐令佢誤會自己愛劉華愛到要生要死的殘酷過程。劉華甚至奉行上幾代男人的訓誨：女人未到七十歲﹐都咪畀飽飯佢食。Sammi唯一一次猛食猛飲﹐是拍MV﹐食完狂喊狂嘔。(出返套戲﹐咪有得睇冇得食羅﹐包腸粉)

Cecilia and Nicholas

最後回歸「愛情」。

《盲探》最令小弟感動的﹐可能全世界得我咁諗﹐是珠海鐵板燒有人通姦﹐兩公婆踢爆阿Joe和女經理仆緊野﹐然後大肚婆對個女人梁振英(摺椅痛毆)一番。

章回小說見得多﹐姦夫淫婦﹐一對肉蟲﹐攬埋一舊﹐像街上野狗交媾﹐扯都扯唔開。《盲探》呢對﹐不過著晒衫者 (著衫做可能重開心)。

大肚婆見老公跌到仆街﹐要扶佢﹐老公推開佢﹐戀姦情熱﹐只想同女經理同生共死﹐攬埋一堆。

大肚婆同戴綠帽的﹐只能表演束手無策：人地都已經唔愛你﹐你又可以做得的咩呢。

放下屠刀啦﹐MAdame﹐你真係冇咩可以做的。