桃姐階級性

"Hongkongers are money-minded, selfish, paternalistic and greedy."
Long Hair
HK Magazine
Mar 15, 2012

「你身邊可有一位桃姐？」﹐海報上的這個問題﹐你會拿來問梁振英嗎？ 聞說佢阿媽穿膠花、「紥腳」﹐不會吧。

小弟發現﹐很少人注意《桃姐》的階級性。聽說片子票房不錯﹐除了愛包場的天主教徒、老人觀眾﹐佢顯然是hit中了特區的中產趣味。

等於電視節目裡﹐蘇絲黃一邊炒飯﹐會一邊口up up﹐回憶細個時屋企個媽姐點醒﹐末了不外乎今外如昔﹐唏噓歎息。《那些年》擊中了愛打飛機的白痴少年﹐《桃姐》則找到了它的偽善的中產目標觀眾。

《桃姐》最令人不安的﹐當然是如何處理「瑟縮在尼龍床上的孤獨住客」。稍有同理心的人﹐至少會一邊掩鼻﹐一邊扮好心關心此人下落﹐但《桃姐》不會﹐片中主角當然不會啦﹐眼不見為淨﹐佢唔會弄污對手﹐只會搵劉夢熊﹐再搭上偶然路過的上海仔﹐搵人上門踢竇﹐恐嚇住客搬走。

假如你話劉德華演得好﹐等於話《打擂台》Teddy演得好一樣﹐食老本而已﹐佢演出的pattern﹐我完全估到(最明顯係佢鬧秦沛「襟公仔」那幕)。

一路看﹐我想起《其後》﹐不過松田優作著山本耀司麻質西裝﹐劉華則來對new balance加boy scout look﹐像太古城行來行去的中年男人﹐真實得來﹐又乾淨﹐又老土﹐又乏味而已。

一般少爺﹐有種出世作風﹐敢有率性表天真﹐生活悠閑﹐不吃煙火。要不就像殘片裡的胡楓﹐放洋留學回來﹐一身中山裝﹐要改革封建餘毒﹐滿腔熱血理想。

劉華則不同了﹐他其實是時下「港童」的長大成人版﹐並帶有強烈攻擊性。

例如畀朱慧敏認錯是冷氣工﹐(昔日)周星馳式特區低下層﹐會調笑兩句﹐乘機抽水﹐但劉華淨係識反唇相譏﹐等對方落唔到台﹐佢亦冇興趣溝女。佢的寸嘴﹐等於EVA裡的精神病少年﹐源自他的AT-Field﹐高度自我防護機制。

數口精、寸嘴、講大話唔眨眼(見於徐克一場)、見人講人話見鬼講鬼話、逃避現實、個性冷酷、好識搵銀、屋企大把水﹐小弟思疑﹐《桃姐》可會是一部讓特區中產倣如照鏡一樣的電影？

俱往矣﹐那已是殖民時代「精英」的故事了﹐至少佢地睡前會睇西報﹐看時代週刊﹐那時的港大師生﹐會一起轟鄭耀宗下台。今日的特區「中產」﹐看的是iphone和壹週刊。

《桃姐》感人處﹐還是老人院的部分﹐與葉德嫻的人情世故吧。片子無法讓人喊得出﹐小弟不敢說﹐又有幾多﹐ 是源自片子折射出來特區中產階級的自私、拘謹、偽善、怯儒及令人反感呢？