狗狗講狗

呢隻DVD提供講評(commentary)﹐最特別的是﹐竟然附有中文及英文(!)字幕﹐重唔係口語既添﹐其製作認真可以想見。當然﹐認真同好壞兩者並不相干。我又唔係話佢地講得差﹐但大部時間止於八卦與獵奇範疇﹐例如：『呢﹐呢場戲係真打﹐個的士佬畀人打到要入廠﹐真係唔好意思』之類﹐觀眾想深入了解作者的思路和手法﹐逐場逐場展示﹐咁就要講聲sorry﹐尤其你知港燦片大部份戲都滾水綠﹐班友廢話連篇的時候﹐就skip左好多值得研究的地方﹐所以睇左一陣﹐其實會覺得其實根本可以瞌埋眼﹐因為經常畫還畫聲還聲﹐好似聽緊傷台的垃圾節目﹐咁就係冇好好利用到個medium﹐做的有意義的事。

任何人都可以想像﹐一條茂利齋Talking兩粒鐘﹐你又唔係舒奇、湯精兆或馬田屎高西斯﹐唔係一件簡單的事﹐對人地的戲指手劃腳反而優而為之﹐要解釋自己作品思維的來龍去脈﹐就好不困難。呢隻碟聰明之處﹐係除左製作人三個﹐重有幾條網絡影癡﹐上去眾聲喧嘩一番﹐講得好聽是親民﹐是權力下放﹐是民主的體現﹐講得難聽就是民粹和反智。查實我只係聽左半粒鐘﹐總體印象冇想像中咁劣﹐但低能對話不少﹐在我看來﹐最白癡的提問﹐莫過於竟然有人話﹐睇唔明片初殺手陳冠希上左的士﹐收左一疊美金﹐點解唔將的錢放落衫袋﹐要貼身綁實係個身度呀 (大意)。

咁樣處理講評﹐對個導演黎講﹐好處係玩急才﹐唔駛點準備﹐同上吳君愚節目狗up差唔多﹐ - 想知人地鬼佬幾認真﹐可看積尼高遜在Passenger的講評﹐你唔駛明佢講乜﹐都覺得係一個演出﹐係語言藝術 - 而最讓我覺得費解的是﹐導演竟然(最少)兩次話﹐『我都唔識解釋點解要咁做﹐但我覺得個演員係要做個咁既動作...』(大意)﹐作為一個創作人﹐就算我地都相信本能大晒﹐又點可以公然講的咁既說話既呢﹐要知道﹐你係向觀眾做緊commentary呀﹐你自己都唔知其然不知其所以然﹐咁叫我地點算好呢？一如以往的印象﹐我只可以說﹐導演係一個honest的人﹐但佢也實在唔係一個思維清楚的人。